Sport by Hoërskool Raslouw

Juf Elizna met haar wakker netbalspelers!

Sport is nie ‘n aktiwiteit wat ons het sodat ons kan spog nie, dit is integraal deel van wat ons doen. ‘n Student ontwikkel as volledige mens en sy liggaamlike, emosionele en sosiale vaardighede word alles ontwikkel deur sport. Tussen 14:00 en 15:00 elke dag speel en kuier ons lekker saam op die sportveld, maar steeds met dodelike erns!

Ons doen baie soorte sport:

  • Boogskiet
  • Rugby
  • Netbal
  • Krieket
  • Atletiek

Soos die kinders se behoefte verander en die seisoene vorder, pas ons ons program aan en sorg so dat elke liewe kind die geleentheid kry om deel te neem en, waar moontlik, ook te presteer! Prestasie is nie die doelwit nie, maar prestasie moet beloon word!

Sonnika het die eerste skut geword wat ń voltal van 50 punte in een rondte by ń boogskietkompetisie behaal het! Dit is die eerste van sommer baie…

Die sport waarmee ons baie kompeterend optree is boogskiet. Ons neem sedert die begin van 2017 deel onder die vaandel van die National Archery in Schools Programme (NASP) en het, met die hulp van ‘n paar skuts uit die laerskool, reeds begin medaljes wen! Ons individuele skuts se prestasies is dan ook stadig maar seker besig om te verbeter!

‘n Interessante feit: Volgens ‘n studie tydens die 2012 Olimpiese Spele in London, is dit net die marathon wat meer energie verbruik as boogskiet op die pad na ‘n goue medalje! Kliek gerus hier om meer uit te vind oor die voordele van boogskiet.

Die seuns berei tans hard voor vir die Warrior Race wat plaasvind tydens November 2018 terwyl die dogters uitsien na die Mud Princess. Interessante doelwitte, hopelik lekker uitkomste!